推薦序
運用語言科技來補破網 強勢語文霸佔語言市場，壓制弱勢語文，定定造成弱勢語言無地出聲，bē當hông看著身影，甚至造成語言流失。語言流失就ná親像漁網仔破空仝款，拄開始只是裂一細縫，若無要無緊，漁網仔會愈破愈大空，到尾仔想欲挽救mā袂赴。欲補破網著愛揣家私。語言科技（languagetechnology）是真適合當做語言復興ê家私。世界上，有愈來愈濟ê語言復振，運用語言科技展開語言ê研究、記錄kah教學。
弱勢語言需要建立語言資源ê基礎建設，譬如講：多模式ê語料庫、電腦自動分析工具、文字化kah數位編碼、語音合成等等。Án-ne咱就會當kā語言資料做記錄、註解、統計kah查詢。允言兄這本冊研究台語文ê語料處理kah線頂資源，提供咱修補語言破空ê重要工具，對咱人話ê保存kah發展有真大ê貢獻。伊m̄-nā處理台語文字化ê議題，koh對變調、台語詞性標記、雙文字轉換系統提出具體ê處理方法。台語已經有袂少ê線頂資源，m̄-koh一直欠缺有系統ê整理，這本冊整理ê線頂資源，對台語文ê研究、教學kah學習攏有真大ê幫助。
允言兄長期投入台語文運動，真早就建立台語文數位化ê語料庫，免費提供社會大眾kah研究者tī線頂查詢。M̄-koh，一般人kan-ta使用，可能m̄知影背後語言科技ê技術kah原理。想欲瞭解台語文有啥物線頂資源kah語言科技通用ê讀者，這本冊真值得參考。
語言學ê研究者有一个定著愛處理ê倫理問題：咱提著語言研究ê語料，chiaê語料beh按怎進一步為語言保存kah復興有所貢獻？Tī這方面，允言兄有真好ê示範。伊kā語言科技kah語言文獻做結合，用「傳遞成果」ê角度，將收集來ê文獻轉化做線頂ê資源，對語言學習、語言記錄kah保存攏有幫贊。
這本冊記錄台語文語料處理ê方法，koh有提供台語文線頂資源予咱參考。語料庫kah線頂資源是台語文現代化ê基礎工程。咱除了需要kā台語文數位化，koh需要有實際ê讀寫實踐，台語才會行出數位博物館，變做有性命ê語言。
國立台東大學華語文學系教授張學謙
導讀
kah說明 這本冊分做七章，第一章導論是台語文相關ê背景介紹，包括台灣多元ê語言現況，針對台語ê部分，kohùi世界ê角度來看咱人話（閩南語）使用ê地理分佈，然後討論台語ê名稱問題，並且說明台語ê處境、轉機kah危機。紲落來介紹台語文書寫ê文字系統，包括羅馬字kah漢字兩大系統，羅馬字會以白話字為主，白話字kah漢字是咱beh處理ê文字。Koh來針對台語文語料處理，tībeh做進前，提出對這項工課ê基本了解、心理準備kah建議。
第二章討論白話字按怎處理，因為Unicodeê編碼政策會使kā兩、三个符號鬥做一个符號，所以有ê白話字符號êUnicode編碼會使有兩款表示方式，可比“á”，有可能是單一ê符號，mā有可能是“a”kah“́”兩个符號鬥起來ê，仝一个符號若用無仝ê表示方式，會造成查詢ê困擾，所以阮提出用純文字ê白話字表示法成做內部表示法，這个表示法ê另外一个好處是排等（[pâi-téng]，sort）ê時，會照咱愛ê聲調順序來排。紲落來討論白話字搜揣ê方式，用一般ê字串比對並m̄是好ê做法，因為可能會揣著真濟無需要ê資料，阮提出兩階段ê搜揣策略，先用一般ê字串比對，揣著ê資料koh經過篩選才呈現予使用者。另外，根據實際台語羅馬字教學ê經驗，有一寡學習者聲調ê分別khah有困難，有ê學習者對入聲（-p/-t/-k/-h）khah無法度掌握，所以阮提出無聲調、入聲kah韻母ê查詢擴展ê方法，mākāchiaê技術應用tī台語線頂字典kah台華線頂辭典ê搜揣。Koh來是白話字顯示，因為內部純文字表示法kah正式ê白話字無仝款，所以提出內部純文字表示法kah正式白話字互相轉換ê方法，純文字表示法kā代表數字ê聲調khǹgtī一个音節ê上後壁（可比“tiau5”），正式白話字ê聲調符號是tī韻母ê一个字母頂頭（可比“tiâu”），需要判斷khǹgê位；顯示ê另外一个做法是kā白話字轉做圖形才顯示。
第三章介紹台語文處理ê一寡家私，包括白話字拼字檢查，白話字文本ê音節、語詞、語句統計，漢羅合用文本音節統計，kah漢羅合用文本斷詞，有ê是台文界有需求，有ê是執行計畫需要抑是研究需要ê家私。白話字拼字檢查是kā一个白話字音節切做聲母、韻母、聲調三部分，一个合法ê台語音節會使無聲母（可比“ūi”是合法ê台語音節），m̄-koh袂使無韻母（可比“kh”m̄是合法ê台語音節），所以愛ùi後壁（聲調）檢查到頭前（聲母）khah簡單，比一个例，“m7”kah“ma7”第一字母攏是“m”，第一个“m”是韻母，第二个“m”是聲母，若ùi頭前開始檢查，就加誠費氣。白話字音節、語詞、語句統計，主要是判斷分界ê符號（delimeter），若是漢羅文本，漢字本身mā是音節ê分界。斷詞是台語文語料beh處理ê時真基本ê家私，阮利用查辭典kah倒頭上大比對演算法來做，m̄-koh因為台語文書寫khah無一致，若是使用者ê用字kah辭典無仝，斷詞結果會錯誤，為著減少錯誤，阮提供使用者會當加添使用者詞庫ê功能來解決這个問題。
第四章teh討論beh按怎做台語文轉做聲音ê線頂系統。Kah華語比起來，台語有複雜ê連讀變調，問題相對困難。文字（輸入）ê部分，因為漢字寫法khah無一致，而且一个漢字可能有幾lō个讀音，koh愛處理斷詞，為著kā文轉音ê問題單純化，阮用白話字做文字輸入。白話字是標本調，所以需要提出變調演算法，阮先整理台語ê七種變調（規則變調、隨前變調、輕聲、再變調、á前變調、三連音變調kah升調），訂出變調ê內部表示法，了後根據討論台語變調ê著作所整理ê規則來揣變調分界組，m̄-kohchiaê規則無夠齊全[chiâu-chn̂g]，所以阮掠一寡文本來看，設法ùi內底揣出變調分界組ê線索，訂出20條變調規則，包括音節、語詞、詞性kah語句四个無仝層次ê規則。詞性ê部分，因為無符合阮需要ê帶詞性標記ê台語辭典，阮利用中央研究院資訊所詞庫小組針對華語ê46个詞性標記做基礎，kā簡化做對判斷變調有幫贊ê12个詞性，對每一个台語語詞，透過台華辭典kā對應去華語，去查這个華語ê詞性。這个規則式ê台語變調演算法，正確率有89%。阮另外請人kā所有台語音節錄音起來，一个音節切做一个聲音檔，使用者輸入ê白話字台文，透過查辭典揣著詞性，koh經過台語變調演算法算出佗一个音節愛讀啥物聲調，了後kā對應ê聲音鬥起來做一个檔案，即時傳轉去予使用者。阮mā討論錯誤ê一寡原因，做未來改進ê參考。
因為台語變調處理ê時，詞性並無做確認（disambiguity），一个語詞可能對應m̄-nā一个詞性。第五章討論台語文ê詞性標記，目標就是beh確認每一个語詞ê詞性。因為資源有限，無法度利用人工來做大量ê詞性標記（成做訓練語料）。阮提出透過kā每一个語詞對應去華語（有khah豐富ê資源），利用華語現有ê詞性標記家私來做台語文ê詞性標記。語料來源是國立台灣文學館台語文數位典藏資料庫ê台語文本，伊是有白話字kah漢羅合用兩種文字一段落一段落對齊ê語料，（舉例：“Tâi-ôantē-itkôanêGio̍k-sanêhū-kūnkhahkēêsó͘-chāi...”對應“台灣第一懸ê玉山ê附近較低ê所在...”），先kā轉做語詞對齊（“台灣/Tâi-ôan第一/tē-it懸/kôanê/ê玉山/Gio̍k-sanê/ê附近/hū-kūn較/khah低/kēê/ê所在/só͘-chāi…”），查台華辭典揣出對應ê華語詞（“台灣{台灣}第一{第一;絕頂}懸{高}ê{的}玉山{玉山}ê{的}附近{附近}較{較}低{低}ê{的}所在{去處;地方;角頭;所在;處所;場所;間量}…”），了後利用HiddenMarkovModel統計模型，提詞庫小組千萬字ê華文語料庫做訓練語料，ùichiaê華語候選詞內底揀出系統認為上適當ê華語對應詞（“台灣[台灣]第一[第一]懸[高]ê[的]玉山[玉山]ê[的]附近[附近]較[較]低[低]ê[的]所在[地方]…”），一个華語詞可能有m̄-nā一个詞性，最後利用MaximalEntropyMarkovModel統計模型決定詞性，對應轉來台語詞（“台灣/Tâi-ôan(Nc)第一/tē-it(Neu)懸/kôan(VH)ê/ê(DE)玉山/Gio̍k-san(Nc)ê/ê(DE)附近/hū-kūn(Nc)較/khah(Dfa)低/kē(VH)ê/ê(DE)所在/só͘-chāi(Na)…”）。根據這个方法，阮得著ê詞性標記正確率是91.6%。了後討論錯誤ê原因，做未來改進ê參考。
第四章ê台語變調處理，實作出白話字轉語音ê線頂系統，總是因為輸入是白話字，對一寡使用者有困難，若是會當直接輸入漢羅台文，系統負責kā轉做白話字，就會使koh-khah發揮系統ê效益。第六章提出利用台語辭典詞條，加上根據台語文語料（包括白話字kah漢羅合用文本兩部分）算出來ê台語音節互訊息kah相關度ê統計資料，來實作出漢羅文本kah羅馬字文本（白話字抑是台羅攏會使）互轉系統。轉換ê正確率，比進前台語信望愛提供ê互轉家私有真大ê提升。互轉系統完成了後，連結第四章所提起ê白話字台語文轉音系統，實作出khah完整ê台語文轉音系統，包括會使輸入漢字抑是羅馬字，羅馬字用白話字抑是台羅mā攏會使。
第二章到第六章所介紹ê系統攏是阮有實際參與開發ê。第七章針對目前線頂會當揣著ê台語文相關資源，分類來做介紹，無限定tī阮做ê系統，有ê系統mā會提出一寡阮ê看法。分做字型、字辭典、語料、電子冊、輸入法、斷詞、雙文字轉換系統、發音系統kah華台翻譯系統九个部分來介紹，主要beh整理現有ê資源，知影資源tī佗位，對beh參與台語文事工抑是相關研究，會當大大提升效率，mā會當感受著，看起來真冷門、弱勢ê這个領域，其實已經累積真濟有心ê人拍拚ê心血。希望後來加入ê友志，會當以這个基礎繼續向前行。
